Haynakoh, kung kailan ipalalabas na ang Regal movie ni Ai Ai de las Alas na D’ Ninang, saka naman inaresto si Jiro Manio sa kasong pananaksak o frustrated homicide sa Marikina.

Porke tinulungan noon ni Ai Ai si Jiro sa pagpapa-rehab, ayan at nababanggit sa tuwi-tuwina ang Comedy Concert Queen.

27-anyos na si Jiro. Kung makipagsapakan man iyan, pam-barangay na usapin iyan. Pero iyong manaksak ka… ibang usapan na iyan.

Huwag naman sanang makaapekto sa bagong movie ni Ai Ai itong ginawa ni Jiro, ‘no?!

SA NETFLIX MAY EKSENANG HOMOEROTIC

 Mas nakaka-enjoy manood ng mga bagong palabas sa Netflix kesa manood ng sine sa mall.

Matipid pa — sa pera at oras. Hindi ka na kailangang gumastos sa pamasahe, tiket ng sine at meryenda.

Hindi ka na kailangang mabuwisit sa trapik, at mainip sa paghihintay.

Andiyan ang penultimate season ng series na Grace and Frankie. Sa first episode ng Season 6, sinabi ni Grace (Jane Fonda) na ang nagkasal sa kanila ni Nick (Peter Gallagher) sa Las Vegas ay isang Filipino na impersonator ni Elvis Presley.

Nakakaaliw ang bagong bersyon ng three-episode na Dracula. Hubad kung hubad si Claes Bang bilang Count Dracula, at may mga eksena ritong homoerotic.

Sa The Witcher, ibang-iba ang dating ni Henry Cavill, na gumanap bilang Superman sa mga pelikulang Man of Steel, Batman v Superman: Dawn of Justice, at Justice League.

Nasa Netflix din ang mga pelikulang The Irishman, Marriage Story, The Two Popes at Klaus na nominado sa 92nd Oscars (Academy Awards).

 MUNDO, BUWAN, TALA.

Pinasikat ng IV of Spades ang kantang Mundo. Mas sumikat ang Buwan ni JK Labajo. Tapos, sumikat din nang husto ang Tala ni Sarah Geronimo.

“Mundo. Buwan. Tala. Ang susunod, Solar System na,” shout out ng kaibigang Leklek Tumalad sa Facebook.

 ROSS AT SHIDO BALIK-TAMBALAN

Balik-tambalan bilang magdyowa sina Ross Pesigan at Shido Roxas sa iWant digital series na The Beauty Queens, sa direksyon ni Joel Lamangan.

Gumaganap sila rito bilang Rico/Rica at Hector.

Talbugan kaya nila this time ang torrid kissing scene nila sa pelikulang Rainbow’s Sunset kung saan gumanap sila bilang young Fredo (Tony Mabesa) at young Ramon (Eddie Garcia)?

At any rate, magmamaganda rin sa The Beauty Queens sina Gloria Diaz, Winwyn Marquez at Maxine Medina.